திமுக கூட்டணியில் இருந்து வெளியேறும் மதிமுக? பொதுக்குழுவில் முக்கிய முடிவு என துரை வைகோ அறிவிப்பு

திமுக கூட்டணியில் இருந்து வெளியேறும் மதிமுக? பொதுக்குழுவில் முக்கிய முடிவு என துரை வைகோ அறிவிப்பு

தமிழகத்தில் அண்மையில் நடந்து முடிந்த சட்டமன்றத் தேர்தல் முடிவுகளுக்குப் பின், ஆளும் தவெக அரசுக்கு திமுக கூட்டணிக் கட்சிகள் சில ஆதரவளித்து வரும் நிலையில், திமுக கூட்டணியில் நீடிப்பது குறித்து மதிமுகவின் பொதுக்குழுவில் இறுதி முடிவு எடுக்கப்படும் என அக்கட்சியின் முதன்மைச் செயலாளர் துரை வைகோ தெரிவித்துள்ளார்.

நடந்து முடிந்த சட்டமன்ற தேர்தலில் திமுக தலைமையிலான கூட்டணியில் மதிமுக, இணைந்து போட்டியிட்டது. இதில் மதிமுக வேட்பாளர்கள் உதயசூரியன் சின்னத்தில் போட்டியிட்டனர். இது குறித்து அதிருப்தி வெளியிட்டுள்ள துரை வைகோ, "கடந்த தேர்தலில் உதயசூரியன் சின்னத்தில் மதிமுக போட்டியிட வேண்டியதாக அமைந்தது மிகவும் துரதிர்ஷ்டவசமானது" என்று குறிப்பிட்டுள்ளார்.

தேர்தல் முடிவுகளுக்குப் பிறகு உருவான புதிய அரசியல் சூழலில், திமுகவின் கூட்டணிக் கட்சிகள் சில புதிய முதலமைச்சர் விஜய் தலைமையிலான தவெக அரசுக்குச் சாதகமான நிலைப்பாட்டையோ அல்லது ஆதரவையோ வழங்கி வருகின்றன. இதனால், தேர்தல் களத்தில் பிரதானமாக இருந்த திமுக தற்போது அரசியல் ரீதியாகத் தனித்து விடப்பட்டுள்ளது போன்ற ஒரு தோற்றம் ஏற்பட்டுள்ளதாக துரை வைகோ சுட்டிக்காட்டியுள்ளார்.

இந்த இக்கட்டான அரசியல் நகர்வுகளுக்கு மத்தியில், "திமுக கூட்டணியில் மதிமுக தொடர்ந்து நீடிப்பதா? இல்லையா? என்பது குறித்து வரும் ஜூன் 27-ஆம் தேதி நடைபெறவுள்ள கட்சியின் அதிகாரப்பூர்வ பொதுக்குழு கூட்டத்தில் விவாதித்து இறுதி முடிவு எடுக்கப்படும்" என்று துரை வைகோ அதிரடியாக அறிவித்துள்ளார்.