டெல்லியில் அமித்ஷாவைச் சந்தித்த ஓ.பன்னீர்செல்வம் முழு விவரம்

தமிழக முன்னாள் முதல்வர் ஓ.பன்னீர்செல்வம் திடீர் பயணமாக டெல்லி சென்று, உள்துறை அமைச்சர் அமித் ஷாவைச் சந்தித்து சுமார் 20 நிமிடங்கள் அவசர ஆலோசனை நடத்தியுள்ளார். 

இந்தச் சந்திப்பு அமித் ஷாவின் நேரடி அழைப்பின் பேரில் நடந்ததாகவும், ஓபிஎஸ் தனிக்கட்சி தொடங்கினால் பா.ஜ.க.வுடன் நிச்சயம் கூட்டணி வைக்க வேண்டும் என அமித் ஷா உத்தரவு பிறப்பிக்க வாய்ப்புள்ளதாகவும் தகவல்கள் தெரிவிக்கின்றன. 

வேப்பேரி கூட்டத்தில் ஓபிஎஸ் தெளிவாகவே எச்சரித்திருந்தார். “2019, 2021, 2024 என மூன்று தேர்தல்களிலும் அதிமுக தொடர் தோல்வி... இப்படியே போனால் கட்சி அழிந்துவிடும். முன்பு இருந்தது போல் ஒன்றுபட வேண்டும். இல்லையென்றால் டிசம்பர் 15-க்குள் முக்கிய முடிவு எடுக்கப்படும்” என்று கூறியிருந்தார். 

அதைத் தொடர்ந்து டெல்லி சென்று அமித் ஷாவைச் சந்தித்திருப்பது, இந்தச் சந்திப்பில் அதிமுக ஒருங்கிணைப்பு, 2026 சட்டமன்றத் தேர்தலில் பாஜக-ஓபிஎஸ் இணைந்து செயல்படுவது, தேவைப்பட்டால் புதிய அணி அல்லது தனிக்கட்சி தொடங்குவது உள்ளிட்ட விஷயங்கள் பேசப்பட்டிருக்கலாம். 

2022-ல் அதிமுகவில் இருந்து நீக்கப்பட்ட பிறகு தனித்து நின்ற ஓபிஎஸ், 2024 லோக்சபா தேர்தலில் பாஜக கூட்டணியில் ராமநாதபுரத்தில் போட்டியிட்டு தோல்வியடைந்தார். அதற்குப் பிறகு “அதிமுகவை மீட்டெடுப்பேன்” என்று தொடர்ந்து போராடி வருகிறார்.

டெல்லி பயணத்துக்குப் பிறகு ஓபிஎஸ் என்ன முடிவு எடுப்பார் என்பதைத் தமிழகமே உற்று நோக்கியுள்ளது. அதிமுக ஒன்றிணைப்பா? பாஜக கூட்டணியில் மீண்டும் இணைவாரா? அல்லது புதிய கட்சி தொடங்கி புதிய அரசியல் பயணத்தைத் தொடங்குவாரா?