பரந்தூர் போராட்டத்தில் கலந்து கொண்டு தவெக தலைவர் விஜய் பேசியது என்ன முழு விபரம்

910 நாள்களாகப் போராடிக்கொண்டிருக்கிறீர்கள். உங்க போராட்டத்த பத்தி ராகுல்னு ஒரு சின்ன பையன் பேசுனத கேட்டேன். அது என் மனச ஏதோ செஞ்சிடுச்சி, உடனே உங்க எல்லோரையும் பாக்கணும்னு தோணுச்சு, உங்க எல்லோர் கூடவும் பேசணும்னு தோணுச்சு, உங்க எல்லோர் கூடவும் நான் தொடர்ந்து நிப்பேன்னு சொல்லணும்னு தோணுச்சு. அதற்கான முன்னெடுப்பு தான் இன்று உங்களை சந்திக்க வந்துள்ளேன் உங்களோடு நாங்கள் தொடர்ந்து இருப்போம் என்பதை சொல்ல தான் வந்தேன். தொடர்ந்து இருப்பேன்

வீட்டுக்கு பெரியவங்கதான் முக்கியமானவங்க, அது போல் நாட்டுக்கு முக்கியமானவங்க உங்களை போன்ற விவசாயிகள். விவசாயிகளின் காலடி மண்ணை தொட்டு கும்பிட்டுவிட்டுதான் என் பயணத்தை தொடங்க முடிவு செய்தேன். அதற்கு இதுதான் சரியான இடம் என எனக்கு தோன்றியது. எனது கள அரசியல் பயணம் உங்கள் ஆசியுடன் இங்கிருந்து தொடங்குகிறது.

மாநில மாநாட்டில் கட்சி கொள்கையை நான் எடுத்து சொன்னேன். அதில் ஒன்று இயற்கை வள பாதுகாப்பு, விவசாய நிலங்கள் பாதுகாப்பு என்ற தீர்மானத்தையும் நான் சொன்னேன். இதை நான் இங்கு சொல்வதற்கு காரணம் ஓட்டு அரசியலுக்காக அல்ல. பரந்தூர் விமான நிலைய திட்டத்தை கைவிட மத்திய, மாநில அரசுகளுக்கு கோரிக்கை விடுப்பேன் என கூறியிருந்தேன்.

இவற்றை தடுக்க சட்ட ரீதியில் நடத்தவும் தயங்கமாட்டேன் என கூறியிருந்தேன். நான் வளர்ச்சிக்கு எதிரானவன் அல்ல. ஏர்போர்ட் வரக் கூடாதுனு சொல்லலை. ஆனால் விவசாய நிலங்களை அழித்துவிட்டு பரந்தூரில் விமான நிலையம் அமைப்பதை ஏற்க முடியாது. எல்லா உயிர்களையும் புவி வெப்பமயமாதல் என்பது பயமுறுத்திக் கொண்டிருக்கிறது.

சென்னை மழை வெள்ளத்தில் தத்தளிப்பதே, இங்குள்ள நீர் நிலைகள் அழிக்கப்பட்டதால்தான் என சமீபத்திய ஆய்வு சொல்கிறது சமீபத்தில் நடந்த ஒரு அறிவியல் ஆய்வில் சதுப்பு நிலங்களை அழித்ததுதான் சென்னையில் வெள்ளப்பெருக்கு ஏற்படுவதற்கு காரணமாம். 90 சதவீதம் நீர் நிலையையும் விவசாயத்தையும் அழித்துவிட்டு வளர்ச்சி திட்டத்தை கொண்டு வரும் எந்த அரசாக இருந்தாலும் அது மக்கள் விரோத அரசாகத்தான் இருக்க முடியும்.